Reverendissmo et Amplissimo Praesuli et Domino, domino Ioanni, Dei gratia Culmensi episcopo, serenissimi regis Poloniae apud caesaream maiestatem oratori, domino meo benignissimo

In Rhomscher Kayserlischer Maiestet Hoef

Salutem et obsequium, et commendationem.

Reverendissime Praesul, domine benignissime.

Ubi te, abiens, in caesaris aula reliqui, contendi velis remisque ad illustrissimum dominum ducem. Domi quam dies quinque non sum moratus et ad serenissimum et clementissimum meum dominum, dominum Foedericum Daniae regem, me contuli. Ei, quod communis socero cum[] genero causa est, aperui, quos isthinc abiens ex re utriusque perspecta habebam. Regi Tuae Benignitatis erga se officia pergrata fuere visusque est mihi Brandeneri legationem iam tum primum iudicavisse. Civitates legatum hactenus Brandenerum Foederici voluntate de postulatis distulere et nunc primum eius assensu consensum est in tractatum magis perendinandi, quam constituendi, quod video studio, ea tamen lege, quod omnia, antequam recipiantur, referantur ad Foedericum. Manus illa in Frisiis ne tantillum animum Frederici deiecit, et si Christiernum illam in suas partes sollicitare non sit obscurum, si quando Christierno pars illius exercitus sacramento militari adstringetur, pars Foederica non minus libenter sequetur. Sciunt et hi Ulixis technas et Graecas artes, et leoninae assuere vulpinam. In qua re pudor maior est iactatio, quam providentia.

Civitates cum Foedrico unam agunt causam, ita adstrictae, ut frustra sit temptare discidium. Causae, ut ego pro mea imprudentia video, impar est legatus Brandenerus gentis agendi pro magnitudine, imbecillior istius, quod cogitant , divortii atque ignoratior.

Mirandum hic gratiosus apud efferos Saxones et princeps salutari iucundum duxit. Habuit hominem, qui ad eam rem ei subpari...aretur et vocaret comitem prognatum caesaris Maximiliani et his vulgus iactat tractari negotium per notum caesaris. Caesari, ut debeo, faveo, hominis ignaviae invideo. Apud meos municipes Hamburgenses reiectus est, quia infrugi indicarent de ea re restituenda tractare, cuius apud eos potestas non esset neque accessisset, quod restituerent umquam receptum scilicet regnum, habitus tum est propter caesarem reverenter. De his, si continget, quod credo, me ad Tuam Benignitatem redire, plura. Nunc tollere manum praetor de tabula iubet.

A serenissimo rege Daniae dimissus sum cum commendatione ad ducem generum. Navigavi ex theloneo Helschenoro in Cimbris, ubi freto Sermaticus(!) Oceanus cum Britannico coit, paene obrutus irato Neptuno furentibus nimbis, servatus tamen Dei munere. Ignivoma quaedam caeli fax porrecta ab Ursulis in Boream diem ante, atque pos[t] exortos nimbos praenuntia fuit tempestatis per noctem. Gedanum, patriam tuam, applicui. Hic veni in notitiam recre[ato] me post nauseam maris cum quodam adolescente Barth[o]lomeo Senger, cui filia sororis tuae nupta est. Hic me in suis aedibus perhumaniter Tuae Benignitatis nomine habu[it]. Invitavit me et mater tua, mulier honestissima atque a[lte]ra quaedam Hecuba. Fuere et ibi sorores tuae, magna ... laetitia audivere, quod a te venerim. Incredibile est omnium tuorum tui desiderium. Beabit omnes Gratia Tua, si quo... poteris ex nassa legationis tuae ad eos erumpe[re].

Ceterum, mi Domine, quae de comitiis, Spirae ad XV August[i] indictis per caesarem isthinc abiens, ferebantur, nescio a[n] consequentur. Apud Fredericum Daniae rogatus de ea re respondi, quae cognovi, sed quia dicebat mihi, neque se, neque alios adhuc principes eo esse vocatos, haeremus atque a... pendemus. Si mihi esset redeundum missione domini ducis, id quod Benignitas Tua praesagiebat, praestaret omnino scire, tamen haud dubie res intra paucos dies erit compe[r]tior. Bene spero illustrissimum ducem meum adventum bo[ni] consulturum, qui tam magnis patronis commendatus v[enio].

Ita me obstrinxit sibi Gratia Tua, ut si effudero quique umquam in me est studii, officiorum et obsequii{i}, nullam tamen partem meritorum tuorum videar assecutus. Vehementerque rogo, ut tua benignitate et patrocinio me semper prosequare, et clientem tuum Rheyneckium et servitorem non dedigna[ris].

Equidem, si bonis condicionibus is princeps me dignabitur, ea sum sententia, ut ex fide et integritate ei, quod mihi est, aut diligentiae, aut operae libenter impendam.

Servitium meum commendo Gratiae Tuae.

Ex Gedano, XV Augusti 1531.

Servitor Gratiae Tuae Ioahim Rheynek, iuris utriusque doctor