Dem ersamen und namhaftigen hern Georgen Scheffke, burggraff und burgermeister der koniglichen stadt Dantzigk, uns[ern] besondern, vilgeliebten freund und sch[wager].

Unnsern freuntlichen grues mit aller wolfart wunschung zuvoran. Ersamer, namhaftiger herr, besonder lieber freunt und schwager.

Ewer Erbarkeit schreibenn neben den zeittungen darin begrieffen / ist uns fast lieb gewest / und woltens auch gerne gleichmessig Ewer Erbarkeit vorgelten. / Es ist aber dismal nichts bei uns anders, / allein das wir den XXV dits / bei dem statdiener habenn zugeschickt, / mit welchem wir auch / uf eines ersamen raths bittlich anfurdern und beger koniglicher maiestet, unnserm allergnedigsten herrn / und den hochwirdigsten hern ertzbischoffe zw Gnisenn / und bischoffe zw Plotzko / mit sonderm vleis / vor die zwei ersamenn hern burgermeister / mit beigelegten copeienn / geschriebenn, / ouch etliche sachen, / als nemlich, / wie wirs uf negstgehaltener thagfart / mit den geschickten / von wegen unsers unmundigen ohemens, / dem inventario / und der freuntlichen hinlegung / und des vorloufnenn von unns schulmeisters halben / vorlossen, / eim ersamen rathe angezeigt, / woruf wir theglich antwurt warten, / derwegen freuntlich bitten, / solchs unsers schreibens eim ersamen rathe Ewer Erbarkeit wolde gedencken, / die wir gotlichen gnaden befelhenn.

Datum aus unserm schlos Heilsberg, den letzten Octobris M D XLIII.

Joannes, von Gots gnaden bischoff zu Ermelanndt /