Dem Hochwirdigsten in Got Furstenn, eddelen wolgebornen [ge]strengen unnd erentfesten herren herrn Iohanni von G[otis g]naden des löblichen stichts Ermelandt, / herrn Tydema[no] des löblichen stichts Culmen bisschoven, / herrn Achatio Zcem[a] dantzker castellano und aufm Stume etc., / herren Nicolao [Dzya]linskÿ colmishem castellano und auffm Strosperg hauptmannen, koniglicher maiestat der lande Prussen rethen itzun[d] zcu Crake, / unsern gnedigen gunstigen herren samptlichenn unnd sunderlichenn

Hochwirdigste inn Gott Furst, / Eddele Wolgeborne Gestreng unnd Erenntfeste Gennedige unnd Grosgunstige Herrenn, / gutte fordere unnd besunder freunde. /

Unnser unvordrossene unnd behegliche diennste seindt Ewer Hochwirdige Gnade unnd Her stetz zcuvorann entpholenn. /

Gennedige unnd Grosgunstige Herrenn. /

Aus furderung eines etzlichen unsers unnd dieser stadt obligens seindt wir bedacht wurdenn denn erhafftigen unnd fastgelartenn / magistrum Thomam Schauenengell unsernn secretarium, zceiger dieses brieffs, ann Ewer Hochwirdige Gnade unnd Her zcufertigenn, / wie wir auch denselbigen mith genugsamer unsers gemuts und befehlen instruction inn crafft dieses abfertigenn, / Ewer Hochwirdige Gnade unnd Her dinstlichs vleisses bittende, sie wollen demselbigen unserm geshickten genedig und gunstig gehoer unnd in alle deme iennigen, was er also in unserm namen reden unnd werben wirten volkomlichen unnd gentzlichen glauben gleich wie uns selbst. Do wir zcur stette werenn gebenn unnd zcukerenn unnd zcu letzt mith tröstlichem gennedigem besheide mith den ersten widderummb an uns gelangenn losszenn. /

Desselbige ummbe Ewer Hochwirdige Gnade unnd Her (die Gott lange gesundt unnd szeliglich fristenn wölle) samptlich unnd sunderlichen im grosszeren zcu vordinen wollenn wir stetz in ungesparten fleissze befunden werdenn. /

Datum Danntzigk, den / 25 / Aprilis anno 43.

Ewer Hochwirdige Gnade unnd Her bereitwillige burgermeistere unnd rathmanne der stadt Danntzigk