Reverendissimo Domino, domino Ioanni Dantisco Dei gratia episcopo Culmensi, amico carissimo et honorand[o]

Reverendissime Domine, domine amice carissime et observande.

Cum proficisceretur istuc cubicularius regius mihique scribendi facultas esset data, non potui ipsi nihil ad Reverendissimam Dominationem Vestram litter[arum] dare, quibus pro vetustate officiorum et amic[itia] [nos]tra Reverendissimam Dominationem Vestram salvere iuberem. Quare, ut R[evrendissima Dominatio] [Vest]ra ex animi sententia valeat sitque semper felix [et fort]unata, vehementer precor ac opto.

Cum hic [apud] maiestatem regiam essem negotiumque capituli Varmiensis [de c]reando episcopo ageretur, ne Reverendissimae Dominationi Vestrae deesse[m], [fa]ciendum putavi. Nam, quod Reverendissima Dominatio Vestra ad retine[n]dum coadiutoriae ius confirmationem summi{s} pontificis non habeat, putant ius suum de eligendo episcopo et veterem consuetudinem nunc etiam valere debere idque sacram maiestatem regiam rogan <t> . Quod si ipsis integrum esse deberet, verendum esset, ne Reverendissimam Dominationem Vestram suffragiis praetereant atque id Reverendissimae Dominationi Vestrae esset fraudi.

Quamobrem etsi reverendissimus dominus episcopus electus Cracoviensis intercessit diligenter sacraque maiestas regia Reverendissimae Dominationis Vestrae causa cupiebat plurimum, tamen ego sacram maiestatem regiam diligentissime quoque rogavi, vellet magis magisque Reverendissimam Dominationem Vestram ea dignitate ornari. Quae litteras suas mittit ad capitulum Varmiense, quibus petit Reverendissimam Dominationem Vestram hac illius iuris praerogativa, ipsis approbantibus, ea [di]ginitate ornari. Non dubito sacrae maiestatis litteras maximum, et quod debeant, habituras esse pondus. Itaque Reverendissimam Dominationem Vestram optime spera[re] iubeo, futurum est enim, ut eam amplitudin[em] [co]nsequatur, quam ad ... omne meum studiu[m] ... [a]c polliceor Reverendissimae Dominationi Vestrae.

Haec Reverendissimam Dominationem Vestram s[cire] [vol]ui, non quod ambitio... meum hoc erga ipsam [Reverendissimam Dominationem Vestram] officium, qui ami[ci]tiarum fructum esse de...m, ut eos, quibuscum coniuncti simus, hic ...ntes, sed ut Reverendissima [Dominatio Vestra] intelligat idque [sibi pe]rsuadeat numquam me commissurum, ut illi op[er]a mea aut cura et auctoritas desit, si quando vel dignitas, vel res, vel commodum Reverendissimae Dominationis Vestrae postulaverint.

Optime felicissimeque valeat Reverendissima Dominatio Vestra.

Datae Leopoli, XIII Augusti anno Domini 1537.

Eiusdem Reverendissimae Dominationi Vestrae deditissimus Ioannes com[es] ... in Tarnov subscripsit