Dem Erwyrdigennn in Goth Herrennn, herrennn Ioanni vonn Gots gnadenn des wyrdigenn gestichts Colmenseh bisschoffe, unszernn gnedigen herrennn

Erwyrdiger in Goth Gnediger Herre.

Unszer bereythwillige und gantzgeflissene dienste myt erbiethunge angenehmer wylfahrunge szeindt Ewer Vaterlichen Gnaden alwege zcuvorn bereidt und entpfohlennn.

Gnediger Herre. /

Wyr fuegennn Ewer Vaterlichen Gnaden in dienstlicher andacht tzu wissennn, / das sich eyne etzliche zcwist und irrung tzw <i> sszen Marienborck und unsz und unszer stadt freyheit / in dennn wessernnn und fisschereyennn / des guts Scharffow / do durch unsz dieselben / eynenn groszen orth vormenennn abtzutzihennn etc. tzugetragennn. / Und dweyl denselbigennn ordt ethwan unszer burger wie / auch folgende die erwirdigennn / in Goth herrenn, herrn Lucas und Mauricius, vonnn Gots gnadennn / des wirdigennn gestichts zcu Ermelandt bisschoffe / ruelich und fridesam besessennn. / Haben wyr unsz auch in dieszem kortzenn eyngange unszers besitzs also vorfencklich / dovonnn / ane vorrgengick und tzumale gegrundetem und wol beleuchtetennn erkenthnisz / nicht konnennn treybennn ader stossennn lossennn. Und hirummbe / bey der koniglichen maiestat eyne comission, / dorinnen Ewer Vaterliche Gnade nebennn andern herren und guthen fründen bestympt und benanth / denselbigen orth tzubesichtigennn, / tzubeleuchten, / tzewge und andere gerechtickeit antzuheren und eyntzunehmennn / und die irrunge entlichen freuntlich / ader do disselb entstunde / durch eynennn rechtlichen spruch aufftzuhebennn etc. aussgedrocht und erhaltennn, / wie Ewer Vaterliche Gnade aussz der comission hirbey vorwandt / selbst in gnaden wirdt vormerckennn.

Derwegennn ist unszer dienstlich und gantz freuntliche bith / Ewer Vaterliche Gnade wolle / myth dem groszmechtigen herren posznanischen woywodennn etc. eyn vornehmennn haben und also / eyne bequeme tzeit, / wenne eyn sulchs / auffs fueglichste vortzunehmennn und jo szunderlich do is Ewer Vaterliche Gnade also gelegen / vor disen negst kommenden herwsts tagen benennen und eynsetzennn / und eyne citacionnn / durch welche die parte tzur sachen gefurdert und geladennn, / welche die andern herrennn comissarii auch besigeln mogen decernyren(!) und ausghien lossen. / Domyt wyr / an dem unsern nicht gehyndert und das part sich auch hynfurder keyner hulfferrehde preysennn ader habennn moge.

Dasselb ummbe Ewer Vaterliche Gnade myt fleis tzuvordienennn / wollennn wyr / alwege / geneigt geflissennn und bereithwillick (Gothe Ewer Vaterliche Gnade szelicklichen und geszunt entpfohlennn) befundennn werden.

Datum Dantzick, sub octava Assumptionis Mariae anno 1534.

Ewer Vaterlichen Gnade gantz willige burgermeister und rathmanne der stadt Dantzick