Martino Bande etc.

Unsern gunstigen grus und alles guts zuvoran. Ersamer, besunder, lieber. /

Ess hat uns der erhafte Matz Plate, unser gutter freundt, durch sein schreibenn angezeigt / und zuvorsthen gebenn, / mit was fleise ihr seins swogers Cornelii von Staden sache bisher gefurdert, / und im beistandt geleistet, / welchs wir uns den nicht wenig von euch haben gefallen lassen, / und mussen deshalben ewer person lobenn, / das die denen beileigt und die schutzet, / den wan mit unbillickeit nochstet, / und zuunderdrucken vormeint, / wie den Cornelio von [S]taden sunder czweifel, / dieweil man nichts rechtlich auf in erwisen, / geschenn ist. Nachdem den nu die sache und actio periurii widder Melchior Adeler / an einenn ersamen radt koninglicher stadt Dantzig / als darzu vorordnete commissarios komen, / und durch den sol vorhoret und geortert werden, / haben wir derwegen an gedochte commissarios unsere schriftliche vorbit gethan, / die wir Matz Platen neben der copeienn zugeschicket, / damit die actio und der sachen process / Cornelio zum nachteil / nicht lange vorzogen, sunder aufs erste von ihnen vorgenomen werde, worin bitten wir, ihr nichts an ewrem fleis / bass zu der sachen austrag wollet lassenn abgenn, / und vielgedochtem Cornelio / in seine... gerechtickeit nicht absthen, / sunder vielmher, / wie bisher von euch geschenn, / im fleisiglichen darin patrociniren, / und mit ewrem rathe furderenn. Wo wir hernacher euch widderumb umb der alten kundtschaft, / die wir mit ewren seligen vater und mutter gehabt, / viel angemen welten und furderung werden kunnen erzeigen, seindt wir darzu willig und erputtig. Gotlichen genaden bovolen.

Datum aus unserm schlosse Heilsberg, den XXXI Decembris M D XLVII.