Freuntlichen grus mit aller selicheit wunschung zuvoran. /

Das Ewer Herlichkeit gesundt von furstlicher durchlaucht und Heylsberg gekhomen, / ÿst mir fast lÿb. / Wer nur auch nicht unlyb gewest, / so Ewer Herlichkeit mich auch het besucht, / das ich bey gethaner entschuldung lass bleyben etc. Es hat mir auch Ewer Herlichkeit grossen wolgefallenn bewysenn in dem, was Ewer Herlichkeit bey furstlicher durchlaucht meynes armen underthans halbenn, des molers, gehandeldt. / Ich mocht gern wyssen, wor umb im das sein entzogen und vorgehalthen wirdt. Was Ewer Herlichkeit anczegst der thagfarth wegen, / sol wyssenn, das negst vor jesternn koniglicher majestet kamer dyner Wolski, / der mit dem hernn colmischn castellan bey mir gewesen, brive mir von koniglicher majestet geantwurt, / in welchen ire majestet unser zusame komenn uff Stanczlay gen Thornn gelegt, / do ich Ewer Herlichkeit in guther gesundtheit gernn werd sehen. Ewer Herlichkeit radt hab ich vor acht thagen mit den geschicktenn des wirdigen cappittels von der Frawenburg gefolgett, / und ist alles zwyschen uns wol gemitteldt und vortragenn. / Was weyther dorin zu thun, / sollen wir samptlich mit den gedachtenn geschicktenn uff negstenn sunthag zu Heylsberg erscheynnenn, / dohin ich mich dysen zukunfftigen freythag / mit Gots hulff wÿl begebennn. / Das sich unsers adels bothen vyl bermuet, / dorbey lassen wirs hin ghen. / Mir hat aber negst der her byschoff von Ploczke geschrybenn, das wir ire vanitatis vorachtenn sollenn, / konigliche majestet werdt den hern, dy aus der Cron zu uns komenn sollen, / solche instruction mitgebenn, / das mutwylliger leut vornhemenn nicht wirdt stadt habenn. / Auch hab ich vor demm colmischen castellan sovil vornhomenn, das ir puchenn ser gelegt yst. / Was sich weytter wirdt zu thragenn, wÿl ich Ewer Herlichkeit durch meynen bruder George, / den ich morgenn noch Danczke schick, lassenn wyssen. / Auch schick ich dysen thag ader morgenn / meyn eygnen bothen mit meym oel macis aus muscaten blubme gedruckt koniglicher majestet, / dorumb mir mein gnedigst fraw dy konnigin geschryben, / das es koniglicher [majestet] vor dy podagra fast nuczlich ist. / Schreÿb auch donebenn alles, was vonothen wir gleich uff dÿ thagfart wyderkhomenn. / Himit Ewer Herlichkeit Gotte mit yren thogentsamenn hausfraw, der ich gesuntheit und alles guts gune, befoh[len].

Datumm Lobaviae, XVI April M D XXXV[II].