Achtpar wierdige herrn. Dieweil aus E A W rath vnd gunstlichen befell der Achtpar wiedrig her Achacius von der Trencke jetzt des Bischtumbs zu Ermlandt Stathalter etc. vns des verstorbnen unsers gnedigen herrns etc. (dem got gnad) nachgelasznen Bruedern vnd Schwestern, hat aussgeben vnd zuhannden gestelt, das gröste tail der aigen gewunnen vnd in diss Löblich Bischtumb eingebrachten guettern so latteinisch peculium genannt werden, Thun wir vor solche gunst vnd erzaigte wolthat, alle sampt nach unserm vermugen, E. A. W. aufs hochst danncken, Vnd dargegen wider vnsern dienst vnd vleis stets willig erpieten. Nun aber so auch nach erfullung des alten Inventarii nicht wenig hinder stollig ist von guetern vnd dingen so auch in das genante pecullium des verstorbnen herrns zuhorn geacht wiert, von welchen hie vnden etlich seint angezaigt vnd biss auf E. A. W. weitters bedencken vorbehalten, Ist vnser vleissiges vnnd dienstlichs bitten wolten vns auch noch dieselbigen gunstigelich zukommen, oder daruor eine billiche erstattung geschehen lassen, das wir (wie billich) mit dest grösserm danck wellen annemen vnd alweg gegen E. A. W. vnd das wyrdig Capitel mit aller dienstperkeit wissen zuverschulden Die guetter aber umb welche wir noch bitten seint diese:

Ins erst ist etlich schön messgwandt vnd pontificalia die der verstorbnen s. g. Von villen herrn vnd freunden geschannckt sein worden, auch sonst in diss Bischtumb gebracht.

Item ein guldin Creutz, mit einer guldenen kettin damit s. g. Der Bischof von krackaw verehrt hat.

Item eine gegossene abcontersehung Gattinarii Cesarii Mt. Gros Canntzler von gold , darneben auch vil ander alte silberne numismata .

Item die Biblioteck, oder Biecher, welche nicht hie gezeuget, sonder in diss Bischtumb gebracht seint, vnd darneben etzliche globes vnd anndere Instrument, in der Astronomei auch eine Indianische beschribene mappa .

Item drei horolegien oder haiger als Nemlich der greste vnd ein ander mit vier vberguldten seulen vnnd der kleinste in einem disem knopff .

Item so E. A. W. wolten das von dem gemell vnd Bildern , welchs nagelfest ist, alda zu hilsperg pleiben solte, Bitten wir noch vmb etlich, welche zwischen denen sein, vnd alda zwar wenig nutz, oder zier geben, an welche doch das Remter gnugsam wiert geziert pleiben.

Item so ist auch sonnst vil ander haussgeraid , von mancherlei dingen , durcheinannder , dei zwar nicht sonderlich nutz werden oder konnen sein, einem zukunftigen hern, der gemeinlich sein gered, vnd des nicht wenig, mit sich pfleget zubringen, Derhalben vmb solchs wir auch noch bittenn.

Doch so E. A. W. villeicht wolten, das alle die oben gemel[...] ding zum peculio geherend, oder Ihrer ein teil soltenn zu hilsperg pleibenn, Bitten wir nichts weniger vmb eine gleich wyrdige vnd billiche derselben erstattung, Vber das dieweil es wol wissentlich ist, das der oftgenannte verstorbene herr, bei funfftzig guter Pferdt mit sich gen hilsperg, In das Bischtumb gebracht, Bitten wir E. A. W. wolten vnns wider, etzlicher geniessen, vnd zum tail werden lassen.

Auff diss alles wolten sich E. A. W. gunstlich bedenckenn, vnd vns ein guetlich antwurt geben, dan wir, was furn Achtpar, wyrdenn, wiert recht, vnd guet duncken. Wellen vnns auch nach aller billigkeit gefallen lassenn, vnd dauor aufs hechst danckenn,

A. W.

Willige

Bernhart, Jerg, Vrsula, vnd Catherina

von höuen, des versterbnen herrns

Bruedern vnnd Schwesternn